Жоңғар-Алатау мемлекеттік ұлттық табиғи паркі. Жоңғар-Алатау мемлекеттік ұлттық табиғи паркі 2010 жылы құрылды, Қазақстанның Алматы облысының Ақсу, Сарқан және Алакөл аудандарында орналасқан. Парктің жалпы ауданы 356 022 гектарды құрайды. Парктің негізгі міндеттерінің ішінде бірегей алма ормандарын — Сиверс алмасы мен Недзвецкий алмасын сақтау және қалпына келтіруге ерекше көңіл бөлінеді, себебі олар әлемдік маңызы бар генетикалық ресурстардың көзі болып табылады.
Парк флорасы өсімдіктің 2168 түрімен ұсынылған, оның 76-сы эндемик. Парк аумағында Жетісу Алатауында өсетін барлық өсімдік түрлерінің кемінде 75%-ы кездеседі. Қазақстанның Қызыл кітабына енгендер, 
мысалы: Сиверс алмасы, бозғылт гүлді шыбышы, жоңғар сасырғүлі. Жоңғар-Алатау мемлекеттік ұлттық паркінің фаунасы өте алуан түрлі және сүтқоректілердің 52 түрін, бауырымен жорғалаушылардың 8 түрін, құстардың кемінде 238 түрін қамтиды. Парк аумағында фаунаның сирек кездесетін және құрып бара жатқан өкілдері кездеседі, мысалы: данатин құрбақасы, қара дегелек, бүркіт, сақалтай, ылашын, үкі, тянь-шань қоңыр аюы, тас сусары, түркістан сілеусіні, қар барысы және т.б.
Ұлттық паркте тарих және мәдениет ескерткіштері де бар, мысалы: Үйгентас қорымы, Сарымсақты өзенінің аңғарындағы оба қорымдары және XIII ғасырға жататын Хорезм шахы Мұхаммед бен Текеш Динарының қорымы. Парк жұмысының бағыттарының бірі — туризмді дамыту және экологиялық-ағартушылық қызмет.