Сабаншы — жабайы мысық. Сырт келбеті жағынан сабаншы парсы үй мысығына ұқсайды: дене ұзындығы 52—65 см, құйрығы 23—31 см; салмағы 2—5 кг. Сабаншының денесі кәдімгі мысыққа қарағанда тығызырақ, қысқа жуан аяқтарда. Қызығы сол — сабаншының қарашығы жарық сәулесінде дөңгелек күйінде қалады, ал үй мысығында олар саңылау тәрізді пішінге енеді. Көздері сары. Сабаншының басы шағын, жалпақ әрі басылыңқы, кең орналасқан кішкентай дөңгелек құлақтары бар. Құйрығы ұзын әрі жуан, ұшы доғаланған. Мысық тұқымдастардың ішінде сабаншы жүнімен әйгілі, оның жүні ең үлпілдек әрі қалың, жүн түсі де қызық — ашық сұр мен сарғыш-қоңыр түстердің қоспасы; түктердің ұштары ақ болғандықтан, сабаншының жүні қармен бүркелгендей әсер қалдырады.
Сабаншы халықаралық және қазақстандық Қызыл кітаптарға енгізілген. Қазақстанда сабаншы негізінен республиканың батысы мен оңтүстік-шығысының тау-далалық және шөл-далалық ландшафттарында кездеседі. Сабаншының мекендеуі үшін бас сауғалайтын орындардың (жартас қуыстары, жыралар және т.б.) болуы, сондай-ақ қыста қар жамылғысының қалыңдығы үлкен маңызға ие. Қызық факт сол — сабаншы қандай да бір себептермен бір алқаптарды мекендеп, басқаларынан аулақ жүреді. Қазақстанда сабаншының мекендейтін жерлерінде, әдетте, адам аз тұрады, сондықтан бұл аңды кездестіру ықтималдығы өздігінен төмен. Соңғы 
деректер бойынша сабаншы Қарағанды, Шығыс Қазақстан және Алматы облыстарының аумағында кездескен. Орталық Қазақстан ұсақ шоқысында да байқалған. Сабаншы тек дерлік шиқылдақтармен және тышқан тәрізді кеміргіштермен қоректенеді, кейде саршұнақтарды, толай қояндарды, суыр балапандарын және құстарды аулайды, жәндіктерден де жиренбейді. Сабаншының мінез-құлқында оның жылдам жүгіруге мүлдем бейімделмегенін атап өтуге болады, қауіп төнгенде ол үшін тығылып қалу немесе жартастарға тез бас сауғалау тән. Қауіп төнгенде сабаншы қырылдаған күрілдеу немесе кенет пысқыру дыбысын шығарады. Сабаншы жылына бір рет көбейеді. Күшіктер сәуір—мамырда дүниеге келеді, кейде бір ұрпақта 6-дан астам күшік болады. Күшіктер соқыр әрі мүлдем дәрменсіз туады. Жаңа туған сабаншының ұзындығы — шамамен 12 см, салмағы — 300 г-ға дейін. 3—4 айда күшіктер аң аулай бастайды. Сабаншының орташа өмір сүру ұзақтығы — 11—12 жыл. Сабаншыны палластың мысығы деп те атайды, оны XVIII ғасырда Каспий теңізінің жағалауында ашқан неміс натуралисі Петер Палластың құрметіне.