Қазақстанда кәсіпорынның теңдесі әзірге жоқ. Кешеннің өндірістік қуаты жылына 70 мың тонна өнімге жетеді. Бірінші зауыттың ашылуымен қатар екіншісінің іргетасы қаланды.
Бірінші кезеңде 70 мың тонна шикізаттан 13 мың тонна шырын концентраттары, пюре және пасталар шығару жоспарлануда. Барлық өнім Түркияға жөнелтіледі. Стратегиялық серіктес – түрік компаниясы Göknur Gıda.
Екінші кезеңде алма қалдықтарынан пектин өндіре бастайды. Жоспар бойынша жыл сайын 1000 тонна пектин және 3 мың тонна алма талшығын Оңтүстік Корея мен Жапонияға жеткізу үшін шығаратын болады.
Қаржылық қолдауды Қазақстан Даму Банкі, «Даму» қоры және «Бәйтерек» холдингінің еншілес ұйымдары көрсетті. Кешеннің аумағы – 30 гектар. Қазірдің өзінде 100-ден астам тұрақты жұмыс орны құрылды.
Ашылу салтанатына Алматы облысының әкімі Марат Сұлтанғазиев қатысты. «Alpecon Group» ЖШС бас директоры Самат Балабеков жобаның шикізаттық емес секторды дамыту міндеттеріне сәйкес келетінін атап өтті.
Компания 2028 жылға қарай елдегі алғашқы толық циклді агроөнеркәсіптік кластерді құруды көздеп отыр. 10 мыңға дейін фермер және аграрлық сектордың шамамен 500 мың қызметкері тартылады деп жоспарлануда.